شمروخ الأراجوز 8

شكشكة شعرية غير دورية بالفصحى والعامية
الشعرا شجر الحياة

الشعرا فى مذهبى اشجار بعدد الشجر

فيهم الكبير والصغير المستحيل لإنحناء

واللى حداه كبرياه .. فيهم

وصاحب داء

والفارع طويل الساق

جنب القصير الحشيشة

ومهدل الغصن فيهم والعديم لأوراق

جنب الكثيف الورق والدايم الخضرة

فيهم عديم الخشب يزحف على طينه

ومن ينام باللمس

ومن يخاف الشمس

ومن يدور فى فلكها بحكم تكوينه

وفيهم النادر اللى بلا مواعيد غصون طارحة

ناعم

تطبطب عليه يعطيك على استحياء

بلسم يداوى برقة لمسته الجارحة

حنظل ونخل وكافور

جميز وصفصاف .. بخور .. فل وزهور

صبار .. وحور

منها اللى ريق العسل .. والمره والمالحة

والعادى .. خضرة وثمر

أو ضل يغوى الغجر فى مواسم الفرحة

يملا القلوب بالأمل .. لما بكل الخجل

يعقد بعرقة السبل

يخطف ضيا الشمس ويشكلها فى قمحه

يخبز رغيف الغلابة ويغزل الجلابية

يوز قلب المتعبين ع السفر

***

الشعرا فى مذهبى اشجار بلا أسماء

فى الأرض فى الحلم نبض وفى الوجود انتشر

يعطى القمر حق فى حضن الليالى يدور

للشمس حق على الظلال والنور

وللبشر حق يخطف قلبهم عصفور

مسحور بعطر الزهور

عارف أسامى وأغنيات الشجر

مخاوى قلب الطفل والعشاق

على سر تلك الجذور المنتمين للطين

متعمدين بالدم .. أو

متعشمين فى الماء

يحرضوا البذرة على الحرية

2002

شكشكة

سيراميكا

مبروك يا سى ويكا

يا بتاع أمريكا

ما بلعنا لسانا… الست شريكه

لها مجلس رسمى .. يتكلم باسمى

ويغير رسمى حسب التكتيكة

صحصح م الجوزة امك أراجوزه

وما عادلك عوزه .. ما بقيت روبابيكا

كانت أيام سوده ..كان سبعة فى أوده

ما عدتشى الموضة دا كلام أنتيكه

جالها اللى فتحها وبلع مفتاحها

وبقت فضايحها للأطلنتيكا

والفن تجلى .شاشات ومجلة

أحزاب حسب الله دقى يا مزيكا

حكمة شبه شعبية

سايق عليك الوطن

سايق عليك ليام

تقول لى سعره النهارده

المترمنه بكام

ورثونا بالدبابات

شروة وباعونا

ما اتعسك شعب راضى

بعسكرة حكام

خايف تبص لورا

مرعوب تشوف قدام

اغتيال البراءة من قتل

عمر وسحر

حبر فظيع فى الحوادث

على ثلاث أعمدة

بيحكى فى حزن حادث

يقطع الأفئدة

*

عن طفل اسمه عمر

عنده سبع سنوات

واخته الجميلة سحر

من أظراف الإخوات

*

طفلين ظروفهم عادية

زى الصور الصور مرسومين

بيغنوا فى حرية

زى الطيور فرحانين

*

واخدين أمان م القضا

يتعفرتوا على بعض

فى البحر أو فى الفضا

أو تحت سطح الأرض

*

وفى التاريخ والغابات

فى السيما أو ع النيل

بيعملوا مغامرات

فى زجل ورسم جميل

*

فيسعدوا الأطفال

فى المدرسة والبيت

حاله تفوق الخيال

من عالم الحواديت

*

فجأة وبلا إنذار

فجأة اختفوا الاتنين

وكأن مجنون حمار

عمل عليهم كمين

*

بغباوة قطع صورهم

فى غل ما له مثيل

فيه ناس بيقبل ضميرهم

يطفوا الضياء النبيل

*

ينسوا حقوق الزمالة

ويدوسوا حتى التاريخ

فى زمن تسوده الندالة

تفوح روايح الطبيخ

*

ويصير مزاج المديرة

فى القبح هو الجمال

الغل يعمى البصيرة

والقتل يبقى حلال

*

دبحوا (سحر) واخوها

برئ وشال ذنب اخته

لكن اما جم يدففنوعا

عميوا بضى ابتسامتة

من نهنات المشيب

الجهل له الف وش

قناع جميل زايف

بعيون وأنف ولسان

ملمس فصيح زالف

يفتن قلوب البشر

ويحلى معايبهم

شرطا يكون الجهول

من جهله مش خايف

*

لضم الإبر صنعة الأعمى

مادام شايف

على شط بحر الهوى رسيت مراكبنا

صبرنا خمسين سنة

وهلكنا وتعبنا

ملعون أبوها الشطوط

اللى بتطفح ملح

نزفت جراحنا وليه

تكرهنا حبايبنا

*

دا حنا رقصنا، لهم

والحبل فى رقابنا

-----------------

رباعية وربع

يا عم ياللى خيالك واطى على قدك

عامل بجبنك مسيح علشان تدير خدك

الثورة يا ابنى نفس وللوطن ناسه

كانوا عطر أنفاسه وخنقهم عفار هدك

*

* لولاه بيت المال ما كنتش زدت عن حدك

فى حب مصر

هيا انزعوا الأقنعة

هذا الوطن مرهون قيامه بضحايا

يطهروا أوهامه من غباوتها

ويصحصحوا أحلامه من غفوتها

ويخلصوه من سقم أيامه

يرجعوا النبض القلوب أشواقه

للعدل والحرية

*

هيا انزعوا الأقنعة

صوركم مش هيه

الفيل ده كان ضفدعة والقرد دا حيه

والنيل فى كاساتكو دم

فعينى مش ميه

قلوبكم مشروخة من أطماعكو مكوية

وورا ابتساما تكو

لوعة حرقة مخفية

الأقنعة ماعادتنش بتدارى

كل الثياب عيرة

ولاسة العمدة منتقل الهزيمة حصيرة

دايس عليها بجزمته الحرامية

هيا اقطعوا حبال اللجام .. بعبعوا

حلوا حياصة البردعة برطعوا

ح تهون ذنوب اللى يعترفوا بخطاياهم

قلوبهم الميتة يحييها إحساسهم

ببلواهم

من ليل عماهم للصباح يطلعوا

مش كل سبل الخلاص مسدوده

ملعون أبوها لقمة البرسيم

يا أمرا ..يا مقاديم ..يا شعرا يا مهازيم

اتحرروا من الدودة

ما ألعنه المركوب لأنه يهيم

وما أندله اللى الغرض ركعه

وما أضيعه اللى خوفه بيطوعه

من ليل ضياعكم يا غجر اطلعوا

أيامكو معدودة

اوطانكو مهدودة

وشعوبكم ع الخارطة ما هيش موجودة

هيا اكفروا بعبادة الملاليم

وراحة التسليم لكل لئيم

يا أهل الحجا والفهم يا مساكين

يا للى انتو كنتو فى يوم ذوى ألباب

وصبح حضوركم غياب

وشعركم كداب .. ومنكمتافه عويل دحلاب

ليه ع المذلة تعضوا بالأنياب

مكتفين العقل للكسين

متبعترين كالبق ع الأعتاب

مسلمين الحق للحجاب

قبلتوا تبقوا حرس باب الولاه العبيد

تفسروا زور الطغاة بالشرع يامناكيد

وتنحروا أولادكم ولا الخرفان

ولا فيش عيد

وتكفروا بالوطن، طمع فى وهم النعيم

من تافه الأسلاب

هيا ارجعوا لأرواحكو يا مساكين

فوتوا العذاب اللى ولى ترحموا الجايين

لو مؤمنين حق يمكن تاخدوا بالأسباب

وتفموا سر الخراب

والعفن

وتقفلوا ف وجه الطاعون الأبواب

يا تبطلوات تفسروا دستوركم الكداب

وتحلقوا لاشناب

وتسبيوا هذا الوطن يقدر يواجه مصيره

يشب يطلع من كماين غيره

لو حتى يتحمى بدماء الضحايا

يطهروا أوهامه من غباوتها

ويصحصحوا أحلامه من غفوتها

تقوم قيامته من سقيم أيامه

تشهق بأنفاس الحياة أشواقه للحرية

يحس تانى إن له اولاد

من تانى يرجع وطن

من تانى يبقى بلاد

12/2002 بالحب مصرية